Саусақтар қатты тоңады: ақтаулық морж қыста теңізге түсудің әдістерін бөлісті
АҚТАУ. KAZINFORM — Ақтау қаласының тұрғыны Еламан Төлеев бала күнінен жаз мезгілінде Каспий теңізіне түсіп үйренген.
Қазір жасы — 27 де. Соңғы 5 жылдан бері ол қыста да теңізге шомылуды әдетке айналдырған.
— Таңда теңіз жақта жүгіретінмін, сол кезде қыста теңізге түсіп жатқан бір топ үлкен кісіні көретін едім. Оларға қарап өмірге құлшынысын сезетінмін. Энергиясы тасып, аурасы ерекше болды. Содан кейін не үшін түседі, қандай пайдасы бар деп интернеттен іздей бастадым. Уақыт өте келе ер адамға өте көп пайдасы барын түсіндім, — дейді Еламан Төлеев.
Салқын суға тұрақты түскеннің арқасында ол 5 жылдан бері тұмау сияқты маусымдық ауруларды ұмытқан.
— Қыста суға түсу тестостерон деген ең маңызды гормонды көтереді. Теріні қатайтады. Мен өзім футбол ойнаймын, бұлшық етті қалпына келтіреді. Шаршап тұрсаң, энергия береді. Себебі дофамин бөлініп, өзіңді күшті сезінесің. Қан айналымына да жақсы. Инфаркт, инсульттың алдын алуға көмектеседі. Қазір көп адамда артық салмақ бар, соған пайдалы. Өйткені салқын суға кіргенде қоңыр май бөлініп, ақ майды жояды, — дейді ол.
Айтуынша, қыста теңізге түсу оңай емес. Ол үшін күнделікті теңізге бара жатқанда өзіңді моральды тұрғыда дайындауың қажет. Әдетке айналдыру адамның ерік-жігеріне байланысты.
— Біз Ақтауда ауа райына қарамастан теңізге шомыла береміз. Каспийдің суы мұз болып қатпаса да салқын болып тұрады. Оған дәлел ретінде айтайын, минус 20 градуста Көлсайға түскенмін. Бірақ ол Каспийден салқын болмады. Орал қаласында мұзға түсіп жүрген адамдар да Каспийдің суы салқын деп айтады, — дейді Еламан.
Қазіргі таңда Ақтауда қыста теңізге түсетін 100-ден астам адам бар. Соның басым бөлігі тұрақты шомылады.
Еламан Төлеев бала кезден теңізде жүзіп үйренгендіктен толқынға да қарамай түсе береді.
— Морждар көбейіп келеді. Қазір жастар да, жасы үлкендер де түседі. Денсаулығына жаны ашитын, күтіммен қарайтын адамдар пайдасын түсінді. Әрине толқын тулап тұрғанда қауіпті болады. Бірақ жастайымыздан түсіп үйренген соң толқынға кіре береміз. Тасқа ұрынбайын деп сақтанып жүреміз. Пайдасы бар екенін біліп, ем болсын деп барғасын ба, содан күш аламыз. Жалпы қауіпті. Саусақтар мен бақайлар қатты тоңып қалады. Оның үстіне Маңғыстауда жел қатты ғой, термоспен ыстық су апарып, қолдарымызды шайып, тез-тез киініп аламыз, — дейді ол.
Өкінішке қарай, Каспий теңізінің тартылуы морждарға да әсер еткен. Олар үйренген аумақтардан кетіп, ыңғайлы жағалау іздеуге мәжбүр.
— Теңіздің тартылғаны өте қайғылы жағдай. Мен өзім теңізге секіргенді жақсы көремін. Сол секіретін жерлеріміз тайыз болып кетті. Қазір секіре алмаймыз, — дейді Еламан Төлеев.
Бұған дейін Каспий теңізінің жағалаудан алыстап бара жатқанын жазған болатынбыз.
