Саяси тұрақсыздық Түркия экономикасын құртып жатыр – қаржы сарапшылары

АСТАНА. KAZINFORM –Түркияның ішкі саясатындағы тұрақсыздық Орталық банкке қосымша қиындықтар тудырып, ел экономикасына айтарлықтай кері әсерін тигізіп жатыр, деп хабарлайды Kazinform агенттігінің меншікті тілшісі.

Кейінгі уақыттағы оқиғалардың салдарынан болған саяси белгісіздік жағдайында сарапшылар ұлттық валютаның девальвациясы мен инфляциялық тәуекелдерді тежеу үшін пайыздық ставкалардың көтерілу мүмкіндігі туралы ескертті.

Стратег Тимоти Эштің пікіріне сілтеме жасаған Karar басылымының хабарлауынша, билік өкілдері лираның бағамын қолдау үшін валюталық резервтерді пайдалануы мүмкін. Бұл ұзақ уақытты қажет етпейтін қадам.

Эш пайыздық ставкаларға өзгеріс енгізбесе лира құнсыздана беретінін, өз кезегінде ол түрік экономикасына деген инфляциялық қысымды арттыратынын жеткізді.

Қазір қаржы нарығын дүр сілкіндірген Ыстанбұл мэрі Экрем Имамоглудың ұсталуынан кейінгі жағдай ерекше алаңдатып отыр.

Өйткені осы оқиғадан кейін Түркия валютасының құны құлдырап, бір доллардың бағасы 40 лирадан астып түсті, ал бір еуро 42,5 лира болды.

Оған жауап ретінде BIST 100 индекстері 7% құлдырады. Бұл дегеніңіз жағдайдың қалай болары белгісіз, ал инвесторлар Түркия экономикасына күмәнмен қарай бастайды деген сөз.

Қаржы сарапшыларының пікірінше, жағдай жақын арада тұрақтанбаса, Түркия бұдан да күрделі экономикалық проблемаларға тап болуы мүмкін. Оларды еңсеру үшін Орталық банк қатаң шарларды қолдануға мәжбүр болады.

Осыған дейін Түркияның ұлттық валютасы құнсызданып жатқаны туралы хабарлаған едік.

Сондай-ақ Түркия билігі Ыстанбұл мэрі ұсталғаннан кейін шеруге шығуға тыйым салды.