Сайлауда өзімізге ыңғайлы адамды өткіземіз дегенді қою керек — Жаңбыршин
АСТАНА. KAZINFORM — Сайлауды «таза» өткізуге жете алмай жүрміз. Мұндай пікірді BIZDIÑ ORTA подкасында Мәжіліс депутаты Еділ Жаңбыршин білдірді.
— Президент халықты мемлекетті басқаруға мейлінше тарту керектігін айтып жүр. Халық мемлекетті басқарудан тыс қалмауы керек. Егер ол мәселеге етене араласса, онда ол мемлекетшіл, отаншыл, мемлекетті қорғауға, оның одан ары дамуына мүдделі болады. Сол үшін оны мемлекетті басқару ісіне тартуымыз керек. Тартудың бір жолы — сайлау. Бұл орайда саяси сауаттылық, саяси мәдениет деген мәселе бар. Саяси мәдениеттілікке жеткен кезде трайбализмнен, жершілдіктен, басқа да қоғамдағы аурулардан құтыламыз, — деді Мәжіліс депутаты.
Оның атап өтуінше, әлі күнге дейін сайлауды «таза» өткізуге қол жеткізе алмай келеміз.
— Сайлауды «таза» өткізуге жете алмай жүрміз. Жалпы, біз ауруларымызды айтуымыз қажет. Дәрігерге барғанда ауруыңды айтпасаң, дәрі бере алмайды ғой. «Сайлау процесін толық бақылауға аламыз, өзімізге ыңғайлы адамды өткіземіз» деген мәселені қою керек. Халықтың сайлаған адамын жіберуіміз қажет. Қисаяр, әйтеуір бүгін-ертең түзеліп кетеді, — деді Еділ Жаңбыршин.
Бұған дейін Еділ Жаңбыршин еліміздің ішкі саясатындағы шаруаның бәрін жүйелейтін біртұтас тұжырымдамалық құжат доктрина не стратегия болуы тиістігін айтқан еді.
