«Сайрам-Өгем» ұлттық паркінде фототұзаққа сирек кездесетін жануарлар ілікті
АСТАНА. KAZINFORM — «Сайрам-Өгем» мемлекеттік ұлттық табиғи паркінің аумағында орнатылған фототұзақтарға сирек кездесетін жабайы жануарлар – Түркістан сілеусіні, Үнді жайрасы, қасқыр және Сібір елігі түсіп қалды.
Бұл кадрлар Қазақстанның оңтүстігінде мекендейтін жануарлар әлемінің алуан түрлілігін тағы бір мәрте дәлелдейді.
Ұлттық парк қызметкерлерінің айтуынша, фототұзақтар тек жануарларды бейнежазбаға түсіріп қана қоймай, олардың қауіпсіздігін қамтамасыз етуге де көмектеседі. Қыс мезгілінде биотехникалық іс-шаралар күшейтіліп, жабайы аңдарға жем-шөп қоры дайындалды.
Айта кету керек «Сайрам-Өгем» МҰТП аумағында барлық аңшылық түріне қатаң тыйым салынған. Жануарлар популяциясын сақтау мақсатында тұрақты түрде табиғат қорғау шаралары жүргізіліп жатыр.
Баянауыл мемлекеттік ұлттық табиғи паркі аумағында орман шебері Арын түнгі уақытта жол жиегінде сілеусіннің қоян аулау сәтін байқап, сирек кездесетін кадрларды түсіріп алған.
Сілеусін (Lynx lynx) – сүтқоректілер класы жартқыштар отрядының мысықтар тқымдасына жататын жыртқыш аң. Сілеусін таулы алқаптардың қылқан жапырақты және жалпақ жапырақты орман өскен белдеулерінде таралған. Денесінің ұзындығы 87-104 см, салмағы 13,2-23,2 кг. Сілеусіннің денесі мығым, басы жұмыр, үшбұрышты құлақтарының ұшында айқын көрінетін қара шашақты шоқтары болады.
2024 жылғы санақ бойынша, Баянауыл ұлттық паркінің аумағында 42 сілеусін мекендейді.
Сонымен қатар Батыс-Алтай қорығының мемлекеттік инспекторлары аумақты аралау кезінде бұлғынды видеоға түсіріп алды.
Бұлғын (лат. Martes zibellina) – сусарлар тұқымдасының сусарлар туысына жататын жыртқыш сүтқоректі аң.
Дене тұрқы 40 – 55 см, құйрығы – 20 см-дей, салмағы 0,4 – 1,6 кг. Қазақстанда Алтайдың қылқан жапырақты ормандарында кездеседі.
Ұсақ жәндіктермен, кеміргштермен, тиінмен, қоянмен, балқарағай жаңғағымен, жидекпен қоректенеді. Шыршалы, балқарағайлы ормандардағы ағаш діңдері мен тас қуыстарды мекендейді.
Айта кетелік Қостанайда сирек кездесетін жануарларды аулаумен айналысқан браконьерлер ұсталған еді.
