Щучье қаласында тұратын ҰОС ардагері 90 жастық мерей тойында пəтерлі болды
Ақкөл ауданы Новорыбинка ауылының тумасы Василий Пазыч 1943 жылы əскер қатарына шақырылып, ұшқыштар даярлайтын училищеде даярлықтан өтеді. Кейін майдан даласына аттанады.Содан оқ пен оттың ортасында жүріп, талай ерліктің үлгісін көрсетеді. Өзінің айтуынша үш рет жаумен бетпе-бет келіп, жылдамдығы мен айла-тəсілінің арқасында ажалдан аман қалған екен.
Соғыс бітіп, Кеңес Одағы жеңіске жеткен соң да елге оралмай, алты жыл Австрияда, екі жыл АЛЖИР лагерінде əскери қызметте болған. Кейін Қарағанды қаласында лауазымды қызмет істеп, зейнеткерлікке шығады. Адам денсаулығына зиянын тигізетін зауытта жұмыс істегендіктен елу жасында зейнеткерлікке шыққаннан кейін де ұзақ жылдар жұмыс істейді. 2000 жылдары Щучье қаласына көшіп келеді.
Майдангерді туған күнімен құттықтай келген аудан əкімі облыс басшысы Сергей Кулагиннің атынан сый-сияпат жасап, пəтердің кілтін табыс етті. Оған қоса аудандық ардагерлер кеңесінің төрағасы Малкелді Жұмағұлов облыстық ардагерлер кеңесінің төрағасы Ғосман Төлеғұлдың атынан құттықтау хат тапсырып, гүл шоқтарын сыйға тартты.