«Семей Гиннестің рекордтар кітабына кіруі мүмкін» - республикалық басылымдарға шолу

АСТАНА. 5 қаңтар. ҚазАқпарат - Қазақ ақпарат агенттігі республикалық басылымдарда 5 қаңтар, бейсенбі күні шыққан өзекті материалдарға шолуды ұсынады.

***

Кеше Қазақстан Респуб­ли­ка­сының Сыртқы істер ми­нис­трі Ержан Қазыханов ЕҚЫҰ-ның Демократиялық институттар және адам құқықтары жөніндегі бюросының (ЕҚЫҰ/ДИАҚБ) Парламенттік сайлауларды байқау жөніндегі мис­сия­сының басшысы Миклош Хараштимен кездесті. Осыған орай «Егемен Қазақстан» газетінде «Миссияаралық есебін жариялайды» деген тақырыппен мақала басылды. Басылымның атап өтуінше, ЕҚЫҰ/ДИАҚБ-ның Парла­мент­­тік сайлауларды байқау жөніндегі миссиясының басшысы Миклош Харашти бүгін Қазақстандағы сайлау науқанына байланысты аралық есепті  жариялайтындықтарынан хабардар етті. Және де министрге миссия жұмысы жайлы әңгімелеп берді. «Біз ертең өзі­міздің сайтымызда аралық есепті жариялаймыз. Бұл есепте сайлауалды науқан барысы, Орталық сайлау комиссиясының, медиалардың жұмысы, партиялардың тіркелуі немесе тіркелмеуі сынды жәйттер қамтылады», - деді Парламенттік сайлауды байқау жөніндегі миссия басшысы.

 

«Егемен Қазақстан» газетінің жазуынша, «Нұр Отан» халықтық-демократиялық партиясы республикалық сайлауалды штаб мүшелері 2012 жылғы алғашқы кездесулерін Батыс Қазақстан облысында өткізді. Нұротандықтар «Қазақстан. 2017 мақсаттары. Ұлттық іс-әрекет жоспары» сайлауалды тұғырнама­сы­ның басым бағыттарын облыстың этномәдени бірлес­тіктер өкілдерімен, мұғалімдер­мен және дәрігерлермен талқылады. Батыс Қазақстан өңірінің тұрғындары Ұлт көшбасшысының партиясын қолдайтындарын жеткізді. «Нұр Отан» партиясы қазақстандықтарды толған­дыр­ған кез келген мәселені жан-жақты қарап, бар­лық жағдайды ескере отырып, шешуге тырысады. Сондықтан болар, кездесуде жұртшылық «Нұр Отан­ның» мақсат-мүддесімен таныс екендіктерін және партияны толыққанды қолдайтындықтарын көрсетті. Олар 15 қаңтар күні сайлауда «Нұр Отанды» қолдауға дайын екендіктерін мәлім етті. Сонымен қатар осы басылымнан Парламент сайлауы додасына түсіп жатқан басқа да партиялардың үгіт-насихат жұмыстарымен кеңінен таныс боласыздар.

***

«Мемлекет басшысы Нұрсұлтан Назарбаевтың атына Қытай Халық Республикасының Төрағасы Ху Цзиньтаодан ҚХР мен Қа­зақстан Республикасы арасындағы дипломатиялық қатынастардың ор­нағанына 20 жыл толуына байланысты құттықтау хат келді», - деп жазады «Казахстанская правда» газеті. Ху Цзиньтао өзінің құттықтау хатында бұдан 20 жыл бұрын Қытай мен Қазақстанның ресми дипло­ма­тия­лық қатынастарының орнауымен екі ел халықтарының арасында дос­тық байланыстардың жаңа парақ­та­ры ашылғанын атап өткен. Өткен 20 жыл бойына Қытай-Қазақстан қаты­настарының қарқынды дамуының жағымды үрдісі өзгеріссіз сақталуда. Тараптар өзара сенімнің жоғары деңгейіне қол жеткізді, өзара мүд­де­лес­тік тудыратын маңызды мәселе­лер­де бір-біріне нақты қолдау көр­сетті. Жемісті ынтымақтастықтың айқын нәтижесі сауда, инвестиция, энергетика, көлік, инфрақұрылым­дық құрылыс және өзге салаларда көрініс тапты.

***

«Семей Гиннестің рекордтар кітабына кіруі мүмкін», - деп жазады «Литер» газеті бүгінгі санындағы «Городская площадь» деген тақырыптағы мақаласында. Басылымның атап өтуінше, бұндай бастаманы Семей мемлекеттік педагогикалық институтының студенттері көтеріп отыр. Шындығында да осыған дейін ескерілмей келген қаланың бұл ерекшелігі әлемнің өзге қалаларында  жоқ болып шығыпты. Қазір қалаға қарасты төңіректің ресми көлемі елдімекендерді қосқанда 27,5 мың шаршы шақырымды құрайды екен.