Семейде 1000-нан астам адам Әнұранды бірге шырқады
СЕМЕЙ. KAZINFORM - 4 маусым – Қазақстан Республикасының Мемлекеттік рәміздері күніне орай Семей қаласында 1000-нан астам адам Әнұранды бірге шырқады.
- Рәміздердің әрқайсысы терең тарихи маңызға ие. Көкте желбіреген Ту, күш-қуат бен береке-бірлікті айқындайтын Елтаңба, салтанатты сәттерде шырқалатын Әнұран Қазақстанның егемендігі мен елдігінің символы. Абай облысында таңертеңнен бері түрлі мерекелік іс-шаралар өткізіліп жатыр. Соның ішінде орталық алаңда өткен ауқымды патриоттық флешмобты ерекше атап өтуге болады. Алаңда бір мезетте мыңнан астам семейлік Әнұранды шырқады, - деп хабарлады облыс әкімдігінен.
Шараға облыс әкімі Нұрлан Ұранхаев, ардагерлер, депутаттар, қоғам қайраткерлері, сарбаздар, тәртіп сақшылары, мемлекеттік қызметшілер, жастар және қала тұрғындары қатысты.
Мереке аясында «Бейбітшілік» аралынан орталық алаңға дейінгі аралықта веложарыс ұйымдастырылды. Оған 200-ден астам велошабандоз қатысты. Жарыста бақ сынағандар патриоттық флешмобқа да қосылды.
Айта кетейік, бүгін жастар арасында тақырыптық көрмелер, челлендждер мен флешмобтар өтеді.
