Семейде 237 отбасыға пәтер кілті табысталды
СЕМЕЙ. KAZINFORM – Конституция күні қарсаңында «Қарағайлы» шағын ауданында пәтер кілттері салтанатты түрде табысталды.
Семей қаласының әкімі Нұрбол Нұрсағатов жаңа баспана иелерін құттықтады.
– Баршаңызды Қазақстан Республикасының Конституциясы күнімен құттықтаймын! Бүгін көпбалалы отбасылар, ерекше қажеттіліктері бар азаматтар, бюджет саласының қызметкерлері мен ата-ана қамқорлығынсыз қалған балалар жаңа пәтердің иегерлері атанып отыр. Мемлекет басшысының қолдауымен кейінгі жылдары құрылыс қарқыны айтарлықтай артып, көптеп тұрғын үй салынды. Бүгін 237 пәтердің кілті табысталды. Биыл наурызда да осы шағын ауданда кезектегі азаматтарға 77 пәтердің кілті табысталған еді. Өткен жылы 211 отбасы жаңа баспана алды. Бұл - әлеуметтік әділеттіліктің жарқын көрінісі, халықтың тұрмыс жағдайын жақсартудағы игі қадам, - деді ол.
