Семейде ерлі-зайыптылардың өліміне кінәлі азамат сотталды
Семей гарнизоны әскери соты қаладағы әскери бөлімдердің бірінің әскери қызметкеріне қатысты сот үкімін шығарды. Ағымдағы жылдың 26 тамызында әскери қызметші «Мазда» автокөлігімен «Семей-Қарауыл» тас жолында жолдың жиегіне түсіп кетіп, бетон трубасына соғылған. Апат салдарынан көліктің ішіндегі 69 және 66 жастағы ерлі-зайыптылар оқиға орнында көз жұмған.
Сот шешімімен кінәлі азаматқа 5 жыл мерзімге бас бостандығынан айыру және 3 жылға көлік құралын басқару құқығынан шеттету жазасы тағайындалды.
«Сотталушының жасаған әрекетіне өкінетіндігін, жауаптылығын жеңілдететін мән-жайлар ескерілді. Және ҚР Қылмыстық кодексінің 63 бабына сәйкес тағайындалған жаза шартты жаза түріне ауыстырылды»,-деді Семей гарнизоны әскери сотының баспасөз қызметінен.
