Семейде осыдан 110 жыл бұрын еуропалық үлгідегі тұңғыш театрландырылған қойылым сахналанды

СЕМЕЙ. KAZINFORM – 1913 жылы 13 ақпанда Семейде еуропалық үлгідегі тұңғыш театрландырылған қойылым сахналанды.

Қойылым жайлы ақпарат алу үшін Kazinform тілшісі ҚР Мәдениет және ақпарат министрлігіне хабарласып көрді.

- Қазақ пьесаларының сценарийлері тапшы болғандықтан, әдеби вариацияда атақты «Біржан-Сара» айтысы қойылды. Қойылым режиссері қазақ әдебиетінің негізін салушылардың бірі Жүсіпбек Аймауытов болған. Қазақ қоғамындағы әйелдердің теңдігі мен әлеуметтік жағдайы тақырыбын көтерген қойылымда Біржан рөлін Жүсіпбек Аймауытовтың өзі сомдаса, Сара рөлінде Тұрар Қозыбағарова өнер көрсетті, - деп хабарлады министрліктің баспасөз қызметінен.

Осылайша, қазақ мәдениеті алғаш рет театр өнерімен толығып, сахнадағы қойылым жиналғандарға ерекше әсер етті. «Ал қазір сол театр бар ма?» деген сұрағымызға министрліктен былай деп жауап берді:

- Ол кезде театр болмаған еді. Сол үшін қазір ол мына театрға айналды деп айтуға келмейді. Жалпы еуропалық үлгідегі бұл алғашқы қойылым Семей қаласында сахналанған деп қана айтып отырғанымыз сондықтан.

Еске салсақ, бұған дейін Алматы қуыршақ театры халықаралық фестивальде бас жүлдені иеленгені хабарланған.