Семейдегі Қаракөл ауылында бірнеше үйдің ауласын су басты

СЕМЕЙ. KAZINFORM – Семей қаласы Озерки ауылдық округінің Қаракөл ауылында бірнеше үйдің ауласын су басты. 

Күн күрт жылынып, қардың жылдам еруіне байланысты қызыл су Қаракөл елді мекеніне жайылды. Қазіргі уақытта жергілікті атқарушы органнан 10 адам және 4 техника суды бұру бойынша жұмыстар жүргізуде.

«Су тасқынының алдын алу шараларын жүргізу үшін Абай облысы ТЖД-дан 13 адам, 4 техника мен 4 мотопомпа ауылға жұмылдырылды. Барлығы 4 үйдің ауласына су кірген. Департамент қызметкерлері елді мекен аулаларын түгел аралап, мониторинг жүргізуде», - деп хабарлады өңірлік ТЖД баспасөз қызметі.

Қосымша 68303 әскери бөлімінен 20 адам және 1 техника көмекке жіберілді. Сонымен қатар еріген қар суы Семей-Қарауыл тасжолының үсті арқылы өткен. Осы сәтте қызыл судың жайылуы тоқтатылды.

«Семей Жолдары» ЖШС-ның 4 адамы және 2 техникасы тәулік бойы кезекшілікте тұр.