Семейдегі түрмеде сотталғандарды жұмыспен қамту үшін жаңа кәсіпорын ашылды
СЕМЕЙ. ҚазАқпарат – Семейдегі ОВ 156/14 түзету мекемесінде сотталғандарды жұмыспен қамту үшін жаңа кәсіпорын ашылды, деп хабарлайды ҚазАқпарат тілшісі.
ШҚО бойынша ҚАЖ департаменті баспасөз қызметінің мәліметіне сүйенсек, ОВ 156/14 қатаң режимді колонияда тағамға қосылатын микрокөктерді өсіретін жаңа кәсіпорын ашылды. Онда сотталғандар дәмдеуіштер өсіріп, табыс таба алады.
«Кәсіпорында жазасын өтеушілер тұрақты жұмыспен қамтылады. Қазір негізінен кресс-салат, сарымсақ, байкон, ақжелкен, брокколи, күнзе, өсірілуде. Оларды салатқа, көжеге, коктейльге, смузиге және де басқа да сусындарға қосуға болады. Дәрумендерге бай мұндай тағамдарға сұраныс та артуда», - делінген ақпаратта.
Сонда жұмыс істейтін сотталған Николай Пактың айтуынша, дәнді сепкеннен кейін жемісті жинауға 5-12 күн қажет.
«Бізде жұмыс істеуге барлық жағдай жасалған. Қажетті жабдықтар да бар. Еңбек еткен адамға бұл жерде уақыт жылдам өтеді. Маған керегі де сол», - дейді ол.
Қазіргі таңда колонияда 236 адам жұмыспен қамтылған. Бұл барлық сотталғанның 87 пайызын құрап отыр.
