Семейлік полицейлер балалар үйінің тәрбиеленушілеріне жаңажылдық сыйлықтар табыс етті
СЕМЕЙ. ҚазАқпарат – Семей қаласының полиция қызметкерлері балалар үйінің тәрбиеленушілеріне жаңажылдық сыйлықтар берді, деп хабарлайды ҚазАқпарат тілшісі.
Қалалық полиция басқармасы баспасөз қызметінің мәліметінше, жаңа жыл қарсаңында Әуезов полиция бөлімінің қызметкерлері №8 балалар үйіне барды. Тәртіп сақшылары тәрбиеленушілерді келе жатқан мерекемен құттықтап, оларға сыйлықтар, атап айтқанда спорттық киімдер, тәтті-дәмді салынған дорбалар, жемістер мен ойыншықтар табыстады. Барлық сыйлықтар Әуезов полиция бөлімі қызметкерлерінің жеке қаражатына сатып алынған.
«Полиция қызметкерлері қайырымдылық шараларына белсенді қатысуда. Мұқтаж жандарға көмек қолын созуға әркез дайынбыз», - дейді Семей қалалық ПБ кадр саясаты бөлімінің бастығы Еркебұлан Жаркенов.
Полицейлер 70-тен астам баланы құттықтады. Бүлдіршіндер мен балалар үйінің басшылығы сақшыларға алғыстарын білдірді.
