Сенат комитеті валюталық реттеу мәселелеріне арналған заң жобасын талқылады

АСТАНА. Мамырдың 6-сы. ҚазАқпарат /Қанат Мәметқазыұлы/ - Бүгін ҚР Сенаты Қаржы және бюджет комитетінің кеңейтілген отырысы өтті.

Онда депутаттар «ҚР кейбір заңнамалық актілеріне валюталық реттеу және валюталық бақылау мәселелері бойынша өзгерістер мен толықтырулар енгізу туралы» заң жобасын талқылады, деп хабарлайды ҚазАқпарат. Аталған заң жобасы валюталық реттеу және валюталық бақылау жүйесін одан әрі ырықтандыруға бағытталып отыр. Осыған орай құжат бойынша елдің экономикалық қауіпсіздігіне және оның қаржы жүйесінің тұрақтылығына қатер төнген кезде Мемлекет басшысының актісімен енгізілетін арнайы валюталық режім шеңберінде қабылданатын шаралар ауқымы кеңейтілді және арнайы валюталық режімді бұзғаны үшін әкімшілік жауапкершілік көзделді. Сонымен бірге заң жобасымен Қылмыстық кодекске, Әкімшілік құқық бұзушылық туралы кодекске, «Валюталық реттеу және валюталық бақылау туралы», «Қазақстан Республикасының Ұлттық Банкі туралы», «Лицензиялау туралы» заңдарға өзгерістер енгізілді. Бұндай түзетулер валюталық реттеуді одан әрі ырықтандыруға, валюталық реттеу режімдері бойынша ұлттық және шетел валютасын репатриациялау жөніндегі рәсімдерді айтарлықтай жеңілдетуге бағытталады. Естеріңізге сала кетейік, Мәжіліс депутаттары жобаны талқылау барысында айырбастау пункттері арқылы жүргізілетін операциялар бойынша шетелдік валютаның сатып алу бағамының теңгеге сату бағасынан ауытқу шегін бұзғаны үшін әкімшілік жауапкершілікті күшейту жөнінде норманы қабылдаған болатын. Сенат комитеті аталған құжатты палатаның жалпы отырысында талқылауға шығару туралы шешім қабылдады.