Сенат Жоғары аудиторлық палатаның мүшесін тағайындады
АСТАНА. KAZINFORM — Бүгін Парламент Сенатының жалпы отырысында Жоғары аудиторлық палатаның мүшесі қызметіне Амангелді Исенов тағайындалды.
— Сенаттың Қаржы және бюджет комитеті өз отырысында Парламент Сенатының төрағасы ұсынған Амангелді Исеновтің Жоғары аудиторлық палатасының мүшесі лауазымына тағайындалуына қатысты кандидатурасын талқылады. Амангелді Исенов 2000 жылдан бастап мемлекеттік қызметте. 2004 жылдан бастап квазимемлекеттік сектор құрылымында экономика және қаржы мәселелері бойынша басшылық қызметтерді атқарған, — деді сенатор Сұлтанбек Мәкежанов.
Сонымен қатар Амангелді Исенов бұған дейін Еуразиялық даму банкінің басқарма төрағасының орынбасары, Қазақстан Даму банкінің басқарма төрағасының орынбасары қызметін атқарды. Экономика саласындағы жетістіктері үшін Ерен еңбегі медалімен марапатталған,
Дауыс беру барысында палата депутаттары аталған кандидатураны қолдады.
Еске салсақ, 2024 жылы желтоқсан айында Сенат ҚР Жоғары аудиторлық палатасының мүшесі Рашит Сайранұлының өкілеттігін тоқтатты.
