Сенатор Б.Әйтімова Беларусьтің Қазақстандағы Төтенше және Өкілетті Елшісімен кездесті
Әңгіме барысында екіжақты, оның ішінде парламентаралық байланыстарды дамыту саласындағы ынтымақтастық мәселелері талқыланды. Сондай-ақ екі елдің заң шығару органдарының арасындағы достық топтарынан Ынтымақтастық жөніндегі комиссияға дейінгі өзара іс-қимылды арттыру оң бағаланды.
А.Ничкасовтың елші ретіндегі дипломатиялық белсенді қызметін атап өткен сенатор Парламенттің қазіргі жұмысы мен Мемлекет басшысының «Қазақстан жолы-2050: Бір мақсат, бір мүдде, бір болашақ» Жолдауын заңнамалық тұрғыда қамтамасыз ету аясында қабылданған заңдар туралы хабардар етті.
Әңгіме барысында сонымен бірге алдағы күндерде Беларусьтің Қазақстандағы күндерін өткізу, сондай-ақ Қазақстанда бірлескен өндірістің толық тізбекті желісін ашу жөніндегі өзара іс-қимылдың келешегі де талқыланды.