Сенатор: «Қазақфильмнің» 300 млн теңгеге түсірген туындысы жеті-ақ мың теңге табыс әкелген

АСТАНА. KAZINFORM –  Сенат депутаты Бекболат Орынбеков Парламент палаталарының бірлескен отырысында бюджеттің тиімсіз игерілуі кино саласында да белең алғанын айтты.

«Отандық кинематография саласында көп жылдан бері келе жатқан үлкен проблемалар бар. 2016-2022 жылдары «Қазақфильмге» кино шығаруға және прокаттауға 14,5 млрд теңге бөлінгенімен оның 4,8 пайызы ғана ақталды», - деді депутат.

Сенатор жекелеген фильмдердің қайтарымына тоқталды.

«Мысалы, «Аруақ» фильміне 300 млн теңге жұмсалса, табысы 7 мың теңге ғана түскен. «Композитор» фильміне 1,2 млрд теңге бағытталса, оның табысы 400 мың теңге болды. Ұлттық киноны мемлекеттің қолдауы орталығы бойынша 2019-2023 жылдары бюджеті 6,7 млрд теңге, ал прокат соммасы 1,1 млрд теңге. Өкінішке қарай, осындай мысалдар өте көп. Сондықтан мемлекеттік аудиторлардың есептері ескерілмеді деген күмән бар», - деді ол.