Сербияда парламент сайлауының қорытынды нәтижесі шықты
АСТАНА. KAZINFORM — Сербияның Республикалық сайлау комиссиясы барлық 8392 сайлау учаскесінен алынған деректерді өңдеп шығып кезектен тыс парламент сайлауының соңғы нәтижелерін жариялады. Дауыстарды санағаннан кейін «Студенттер тізімі — Студенттер жеңеді» қозғалысы 53,01%, ал «Александр Вучич — Біртұтас Сербия» тізімі 38,98% дауыс жинады, деп хабарлайды Kazinform агенттігінің меншікті тілшісі.
Сербия сайлау комиссиясының мәліметтері бойынша, сайлауда 4 444 310 адам дауыс берген, бұл тіркелген жалпы сайлаушылардың 68,89%-ы. «Ивица Дачич — Тұрақтылық факторы» тізімі 2,13% дауыс жинап, 3 пайыздық межеден өте алмады. Аз ұлттар өкілдері де жаңа парламентке өтіп отыр.
Негізгі сайлау 25 қазанда өткен.
1 қарашада Сербия сайлау комиссиясының шешімімен, бұрын нәтижелері жойылған немесе анықталмаған 53 сайлау учаскесінде қайта сайлау өткізілді. Осы нәтижелерді ескергеннен кейін, Студенттер тізімінің үлесі 53,01% болды.
Қозғалыс 2024 жылдың 1 қарашасында Нови Сад теміржол вокзалының шатыры құлағаннан кейін басталған жаппай наразылықтар нәтижесінде пайда болды. Тізімді Нови Сад университетінің медицина факультетінің кардиологі және профессоры Илья Срданович басқарады. Оған ғалымдар, дәрігерлер, қоғам қайраткерлері және танымал мамандар қосылды. Қозғалысқа үміткерлер студенттердің жалпы жиналыстары арқылы іріктелді.
Александр Вучич 25 қазан кешінде жеңілісін мойындады. Алдын ала нәтижелерге сәйкес, Студенттер тізімі 250 орындық парламенттен шамамен 140 орын алып, абсолютті басымдыққа ие болып отыр, ал Вучичтің тізімі шамамен 103-104 орынға ие болады. Осылайша Сербия прогрессивті партиясының 14 жылдық үстемдігі аяқталды.
Бақылаушылардың айтуынша, сайлаушылар дауыс беруге белсенді қатысқан. Әрі көптеген сайлау учаскелерінде дауыс беру процесі салыстырмалы түрде тыныш өтті. Жаңа Халық жиналысы заңды түрде белгіленген мерзімде құрылады, содан кейін басымдыққа ие партия үкіметті жасақтайды.
