Шабуыл жасалған нысан Каспий құбыр консорциумына тиесілі емес — консорциумның баспасөз хатшысы

АСТАНА.KAZINFORM — «Кропоткинская» мұнай айдау стансасындағы жағдай әлі өзгеріссіз. Бұл туралы бүгін Kazunform тілшісіне Каспий құбыр консорциумының баспасөз қызметі хабарлады.

— Станция жұмыс істемейді, қалпына келтіру жұмыстары жүріп жатыр. Мұнай құбыры жұмыс істеп тұр, тиеу жұмыстары әдеттегідей жүріп жатыр, — деп жауап берді КҚК баспасөз хатшысы Илья Архипов.

Сонымен қатар ресейлік БАҚ пен Telegram арналары 19 наурызда КҚК инфрақұрылымына тағы бір дрон шабуылы жасалғанын хабарлады.

— Шабуыл жасалған нысан КҚК-ға тиесілі емес, — деп түсіндірді Илья Архипов.

2025 жылдың 17 ақпанында Каспий Құбыр консорциумының мұнай тасымалдау объектісі «Кропоткинская» мұнай айдау станциясына дронмен шабуыл жасалды.
Қазақстанның «PetroCouncil» мұнай-газ кеңесінің төрағасы Асылбек Жәкиевтің пікірінше, 2 ай ішінде соққы салдарын жою оптимистік сценарий болып саналады.

КҚК акционерлері сол кезде дрон шабуылынан кейін жөндеу жұмыстарын жүргізуді қолдайтындықтарын мәлімдеді.

7 наурызда Энергетика вице-министрі Әлібек Демеуов Қазақстан наурыз айында КҚК бойынша мұнай айдау көлемін қысқартатынын хабарлады.