Шахмат Олимпиадасында еліміздің әйелдер құрамасы тағы жеңіске жетті
НҰР-СҰЛТАН. ҚазАқпарат - Үндістанның Ченнай қаласында өтіп жатқан шахмат Олимпиадасында еліміздің әйелдер құрамасы алтыншы жеңісіне қол жеткізді, деп хабарлайды ҚазАқпарат тілшісі.
Еліміздің әйелдер құрамасы Словакиядан 3,5:0,5 есебімен басым түсті. Қазақстандық шахматшылар қатарынан Жансая Әбдімәлік, Бибісара Асаубаева және Гүлісхан Нахбаева жеңіске жетсе, Ксения Балабаева қарсыласымен тең түсті.
Бұл - қазақстандықтардың алтыншы жеңісі. Олар бұған дейін Перу, Куба мен Бельгияны 3:1, Вьетнамды 2,5:1,5, Гватемаланы 4:0 есебімен жеңіп, Моңғолиямен 2:2 есебімен тең түсті. Ал Әзербайжанға 1:3 есебімен жол беріп қойды.
Ал еліміздің ерлер құрамасы бүгін Әзербайжанға 1,5:2,5 есебімен жол беріп қойды.
Ерлер құрамасы бұған дейін Ливан мен Латвияны 4:0, Қытай Тайбейін 3:1, Марокко, Чехия, Испанияны 2,5:1,5 есебімен жеңіп, Тәжікстанға 1,5:2,5 есебімен есе жіберген-ді.
Олардың қатарынан Әлішер Сүлейменов, Ринат Жұмабаев тең түссе, Арыстанбек Оразаев пен Қазыбек Нөгербек қарсыластарына есе жіберіп қойды.
Ерлер құрамасының еншісінде 6 жеңіс, 2 жеңіліс бар.
Еске салайық, бұған дейін Бибісара Асаубаева Азияның үздік шахматшысы атанғанын, оны бұл жетістігімен ҚР Президенті Қасым-Жомарт Тоқаев құттықтағанын жаздық.
