Шамадан тыс кредит алғандарға арналған кеңселер ашылып жатыр

АСТАНА. KAZINFORM - Елімізде несие алып төлей алмай жүрген азаматтарға кеңес беретін арнайы кеңсе жұмыс істей бастайды. Бұл туралы Қаржы министрі Ерұлан Жамаубаев мәлім етті.

«Қарызсыз қоғам» жобасы аясында арнайы жол картасы әзірленіп, бекітілді. Ол 6 негізгі бағыт бойынша 25 іс-шараны қамтиды. Жол картасының әрбір бағыты бойынша жұмысты үйлестіру үшін әкімдіктерде жауапты лауазымды тұлғалар бекітілді. Республикалық маңызы бар 3 қалада және еліміздің 17 өңірінде халықпен тікелей жұмыс істейтін өңірлік жобалық кеңселер құрылып жатыр», - деді Ерұлан Жамаубаев Үкімет отырысында.

Оның айтуынша, бүгінде халықтың шамадан тыс кредит алуы проблемасы өзекті.

«Жобалық офистердің негізгі міндеті мерзімі өткен кредиттерді реттеу, қаржылық алаяқтықтан қорғау, сондай-ақ, азаматтардың банкроттық мәселелерін шешуге, жұмысқа орналастыруға жәрдемдесу және бизнесті қолдау шараларын ұйымдастыру. Әкімдіктер жобалық офистердің жұмысы үшін қажетті ғимараттар мен материалдық-техникалық базаларды бөледі. Оған банктер қаржылық жағынан ықпалдасатын болады. Жобаның тағы бір маңызды бағыты – азаматтардың, оқушылар мен студенттердің қаржылық сауаттылығын арттыру», - дейді ол.