Шардарада әкесіне қол көтерген азамат мешітте азаншы болған емес – бас имам

ТҮРКІСТАН. KAZINFORM – Қазақстан мұсылмандары діни басқармасы әлеуметтік желі қолданушыларын тексерілмеген, жалған ақпарат таратпауға шақырды.

Әлеуметтік желілерде Түркістан облысы, Шардара ауданында әкесін ұрған азаматтың «мешіттің азаншысы» екені жөнінде тараған ақпарат шындыққа жанаспайды. Бұл жағдайға байланысты Қазақстан мұсылмандары діни басқармасының Түркістан облысы және Түркістан-Ахмет Яссауи мешітінің бас имамы Ержан Төлепов ресми түсініктеме берді.

— Аталған азамат Қазақстан мұсылмандары діни басқармасына қарасты дін қызметкері емес. Ол мешітте ешқашан азан айтып, ресми діни қызмет атқармаған. Дін саласына қатысы жоқ, негізгі кәсібі — мәдениет саласы, қосымша той жүргізушісі (тамада) болған, — деді бас имам.

Сонымен қатар, ҚМДБ мұндай әрекеттерді қатаң айыптайтынын жеткізді. «Ата-анаға құрмет — әрбір мұсылманның басты міндеті. Сондықтан қоғамды, әсіресе БАҚ өкілдері мен әлеуметтік желі қолданушыларын тексерілмеген, жалған ақпарат таратпауға шақырамыз», — делінген мәлімдемеде.

Айта кетейік, бұдан бұрын Түркістан облысында әкесін ұрып, қорлық көрсеткен тұрғын қамауға алынғанын жазған болатынбыз.