Шайбалы хоккейден ӘЧ: Финалда Чехия мен Щвейцария кездеседі

АСТАНА. KAZINFORM - Шайбалы хоккейден әлем чемпионаты элиталық дивизионында финалға шыққан екі құрама анықталды.

Жартылай финалдың алғашқы жұбында Швеция және Чехия құрамалары шеберлік байқасты. Алғашқы кезеңде қос құрама тең дәрежеде ойнады. Қалған екі кезеңде чехиялық құраманың белсенділігі байқалды.

Нәтижесінде Чехия құрамасы қарсыласын 7:3 есебіен тізе бүктірді.

Тағы бір ойында Канада мен Швейцария кездесті. Ойынның негізгі кезеңі 2:2 есебімен тең аяқталып, буллиттен швейцариялық құрама басым түсті.

Енді 26 мамырда өтетін финалда Чехия мен Швейцария кездессе, 3-орын үшін Швеция мен Канада шеберлік байқасады.

Айта кетсек, биыл Қазақстан құрамасы элиталық дивизиондағы орнын бесінші жыл қатарынан сақтап қалды.

Қазақстандық хоккейшілер топтық кезеңде Франция мен Польшаны 3:1 есебімен жеңсе, Словакияға 2:6, Латвияға 0:2, Швецияға 1:3, Германияға 2:8, АҚШ-қа 1:10 есебімен есе жіберді.

Қазақстандық хоккейшілер 1998 жылдан бері әлем чемпионаты элиталық дивизионында ел намысын қорғап қайтты. Әзірге ең жоғары жетістігі – 2021 жылғы оныншы орын.