Шенеуніктер елорданың қонақ үйлерінен орын ала алмағандықтарына шағымданды

АСТАНА. ҚазАқпарат - ЕХРО-2017 халықаралық көрмесі өтетін кезеңде елорданың қонақ үйлерінен нөмірге алдын ала тапсырыс беру мүмкін емес. Мұндай пікірді бүгін Астана әкімдігінде өткен туристік және қонақ үй бизнесі саласындағы қызметтерді реттеу мәселесін қозғаған өңірлік штаб отырысында ҚР Мәдениет және спорт министрлігі Туризм индустриясы комитетінің басқарма басшысы Жалғас Балғожин білдірді, деп хабарлайды ҚазАқпарат.

Оның атап өтуінше, мұндай жайт елордалық қонақ үйлердің өз бөлмелерінің бағасын нақты бекітіп, жария етпеуінен орын алуда.

«Туристік компаниялар тарапынан қонақ үйлерге наразылық көбейіп тұр. Өйткені, ЕХРО көрмесі кезінде қонақ үйден алдын ала нөмірге тапсырыс беру іс жүзінде мүмкін емес. Яғни, шілде, тамыз, қыркүйек айларында. Себебі сіздер бағаларыңызды ұсынбайсыздар, оларды нақты бекітпейсіздер әрі оны ауыстыра бастайсыздар», - деді ол.

Комитет басшысының айтуынша, елордалық қонақ үйлердің барлығы да дәл осы жолда деп айтуға болмайды. Дегенмен, ондайлардың кездесіп жатқандығы шындық.

«Біз нөмірлерді тиімді сату үшін қазірден бастап сонау қыркүйек айының соңына дейінгі бағаларды бүгіннен бастап жария етуіміз қажет», - деді Балғожин.

Сонымен қатар ол өз сөзінде елорданың әрбір қонақ үйі саясат бюросын ұйымдастыруы тиістігін баса айтты.