Шетелдік БАҚ-тағы Қазақстан: Әлемдегі орта держава және Президенттің Қатарға сапары
Осы аптада бірқатар шетелдік БАҚ-та еліміз туралы көптеген мақалалар жарияланды. Әлемдік баспасөз беттерінде Қазақстанның әлемнің орта державаларының қатарына қосылуы, Мемлекет басшысының Қатарға сапарының қорытындылары және БАӘ үкіметімен жаңа алмасу бағдарламасы туралы мақалалар легі жарияланды. Толығырақ Kazinform сарапшысының шолуында.
The Times of Central Asia: Қазақстан президенті - Қатар Консультативтіккеңесі алдында сөз сөйлеген алғашқы шетелдік көшбасшы
Times of Central Asia агенттігі Қазақстан Президенті Қасым-Жомарт Тоқаевтың 13-14 ақпанда Қатарға мемлекеттік сапары барысында Дохада Консультативтік ассамблеяның (Мәжіліс аш-Шура) мүшелері алдында сөз сөйлегенін хабарлады.
Мақалада Қазақстан тарапы мен Қатар Әмірі Тамим бен Хамад әл-Тәни арасындағы келіссөздер нәтижесінде он шақты құжатқа қол қойылғаны туралы жазылған. Негізгі келісім «QazaqGaz» АҚ мемлекеттік компаниясы мен Қатар UCC Holding арасындағы Қашаған кен орнында газ өңдеу зауытын салудағы ынтымақтастыққа, сондай-ақ «Самұрық-Қазына» ҰӘАҚ, ҚР Энергетика министрлігі мен Қатар халықаралық энергетикалық холдингі арасындағы энергетика және газ саласындағы жобаларға бағытталған.
«Тоқаев мемлекеттік деңгейдегі келіссөздерден кейін елдерарасындатолыққанды стратегиялық әріптестік орнатуды ұсынды. Сонымен қатар, Тоқаев 2025 жылы Парсы шығанағы мен Орталық Азияны байланыстыратын интермодальдық көлік желісін дамыту, сондай-ақ ауыл шаруашылығы саласындағы ынтымақтастықты кеңейту және бір-бірінің астаналарында Қазақстан мен Қатардың мәдени көрмелерін ұйымдастыру қажет екенін атап өтті», - делінген The Times of Central Asia мақаласында.
Келіссөздер барысында Қазақстан Президенті Қатарға 250 миллион долларға 60 шикізаттық емес тауардың экспортын ұлғайтуға дайын екенін мәлімдеді, сондай-ақ екіжақты сауданы 500 миллион долларға дейін ұлғайтуды ұсынды.
Trend.az: Қазақстан мен Қатар тағы бір газ өңдеу зауытын салуды жоспарлап отыр
Әзербайжанның Trend.az ақпарат агенттігі «Самұрық-Қазына» АҚ (Қазақстанның Ұлттық әл-ауқат қоры), ҚР Энергетика министрлігі және Power International Holding WLL тобына кіретін қатарлық Urbacon Concessions Investments WLL компаниясы Дохада өзара түсіністік туралы Меморандумға қол қойғанын хабарлады. Тараптар арасындағы келісім қуаттылығы 6 млрд текше метр газ өңдеу зауытының құрылысын салуды көздейді.
«Құжаттың мақсаты-Қашаған кен орнында газ өңдеу зауытын салу жобасын бірлесіп әзірлеу жөніндегі ниеттерді бекіту», - делінген Trend.az мақаласында.
Агенттіктің мәліметінше, бұған дейін қазақстандық QazaqGaz компаниясы мен қатарлық UCC Holding компаниясы Қашаған кен орнында қуаты жылына 1 млрд м3 және жылына 2,5 млрд м3 болатын екі газ өңдеу зауытын салу туралы келіскен.
«Келісім шеңберінде инвестиция тартылады және жобаларды қаржыландыру ұйымдастырылады. Бұл зауыттардың құрылысы Қазақстанда тауарлық газдың ресурстық базасын ұлғайтуға ықпал етеді», - делінген мақалада.
Сонымен қатар, агенттік Қазақстан Орта мерзімді перспективада жаңа газ кен орындарын енгізу есебінен газ өндіруді ұлғайтуды жоспарлап отырғанын мәлімдеді.
Doha news: Қатар мен Қазақстан көптеген келісімдер арқылы қарым-қатынасты нығайтады
Doha news ақпарат агенттігі Қазақстан мен Қатар арасындағы қарым-қатынасты нығайту туралы мақала жариялады. Мақалада Қазақстан Президенті мемлекеттік сапармен Қатардың астанасы Дохаға келгені туралы жазылған. Салтанатты рәсімге Қатар Әмірі шейх Тамим бен Хамад Әл-Тәни мен Қазақстан Президенті Қасым-Жомарт Тоқаев төрағалық етіп, екі ел арасындағы бірнеше маңызды келісімдер мен өзара түсіністік туралы меморандумдарға қол қойған.
«Бұл рәсім заң, жұмыспен қамту, ақпараттық технологиялар, әлеуметтік даму, жастар бастамалары, адалдық, банк ісі, телекоммуникация, энергетика және инфрақұрылым жобаларын қоса алғанда, кең ауқымды секторлардағы ынтымақтастықты нығайтудағы маңызды кезең»,- делінген Doha news мақаласында.
Агенттіктің мәлімдеуінше, бұл жобалар екі елдегі энергетика секторының өсуі мен тұрақтылығына айтарлықтай үлес қосады деп күтіледі.
Euractiv:Қазақстан «Орта державалар» қатарына енді
Euractiv агенттігі халықаралық қатынастар мен қауіпсіздікті зерттеуге маманданған Германияның талдау орталығы 20 миллион халқы бар, теңізге шыға алмайтын Орталық Азия елі Қазақстанды алғаш рет «орта держава» санатына жатқызғанын хабарлады. Германиядағы «Ғылым және саясат қоры» (SWP) ғылыми-талдау орталығы әлемдік «орта державаларға» арналған зерттеуді 23 қаңтарда жариялаған.
Euractiv ақпарат агенттігінің хабарлауынша, зерттеушілер Қазақстанды байыпты сыртқы саясатымен, Орталық Азиядағы негізгі ойыншы ретінде орныққаны, бай ресурстарымен және «Орта дәліздің» негізгі элементі ретінде ерекше атап өтті.
«Қазақстан АҚШ пен Еуропаның қызығушылығын тудырған бай ресурстарға ие (әсіресе мұнай, металдар, пайдалы қазбалар және сирек кездесетін жер элементтері). Елдің экологиялық таза энергия көздерін (сутегі) өндіруге әлеуеті бар, оған Еуропалық Одақ (ЕО) соңғы уақытта қызығушылық танытып отыр»,- деп келтіреді Euractiv зерттеуінің авторлары.
Wam.ae Мемлекеттік тәжірибе алмасу бағдарламасы Қазақстан, Мальта және Мадагаскар елдерімен көшбасшылықты дамытудың жаңа бағдарламаларын жариялайды
Wam.ae араб ақпарат агенттігі БАӘ-дегі Мемлекеттік тәжірибе алмасу бағдарламасы Қазақстанмен, Мальтамен және Мадагаскармен көшбасшылықты дамыту бағдарламаларының іске қосылғаны туралы хабарлады. Бұл туралы 2024 жылғы Дүниежүзілік үкімет саммиті кезінде айтылған.
Агенттіктің мәліметінше, бағдарлама БАӘ модернизациялау және ұлттық даму саласында қабылданған озық тәжірибелер мен білім алмасу алаңы. Көшбасшылық бағдарламасы Мұхаммед бин Рашид көшбасшылықты дамыту орталығымен және Мұхаммед бен Рашид басқару мектебімен бірлесіп әзірленген.
«Бағдарлама Дүниежүзілік үкіметтік саммитке қатысушы елдер мен БАӘ үкіметі арасында бірегей тәжірибе құруға бағытталған. Қосарлы бағдарламалар одан пайда алу үшін әр елдің талаптарына сәйкес жасалған», - деп хабарлады министрлер кабинетінің бәсекеге қабілеттілік және біліммен алмасу жөніндегі орынбасары Абдулла Насер Лут.
Олардың мәліметтері бойынша, БАӘ үкіметінің тәжірибе алмасу бағдарламасы 180-нен астам үкімет басшыларын – 46 елдің өкілдерін дайындады.
