Шетелдік көздерден қаржыландырылатын тұлғалардың тізілімі жарияланды

АСТАНА. KAZINFORM — ҚМ Мемлекеттік кірістер комитеті ресми www.kgd.gov.kz сайтында 2024 жылдың екінші жартыжылдығында шетелден қаржыландыру алған тұлғалардың кезекті тізілімін жариялады.

Жалпы, 2023 — 2024 жылдары 295 адам мәліметтерді ұсынды, оның ішінде тұрақты түрде — 118 тұлға, мерзімді — 96, бір реттік — 81 тұлға.

— 2023 жылы шетелдік көздерден ақша және (немесе) мүлік алу туралы мәліметтерді 28,7 млрд теңге сомасына 267 тұлға ұсынды (2023 жылғы 1 жартыжылдықта — 14,3 млрд теңгеге 239 адам, 2023 жылғы 2 жартыжылдықта — 14,4 млрд теңгеге 192 адам). 2024 жылы шетелдік көздерден ақша және (немесе) мүлік алу туралы мәліметтерді 27,2 млрд теңге сомасына 218 тұлға ұсынды (2024 жылғы 1 жартыжылдықта — 13,6 млрд теңгеге 192 адам, 2024 жылғы 2 жартыжылдықта — 13,6 млрд  теңгеге 200 адам), — делінген Мемлекеттік кірістер комитеті хабарламасында.

Бұл шара азаматтардың мемлекетке де, үкіметтік емес ұйымдарға да сенімінің деңгейін арттыруға бағытталған.

— Өз қызметі және шетелдік көздерден алынған ақша қаражаты туралы есептерді ұсыну туралы талаптар әлемдік тәжірибеге сәйкес келеді, — делінген хабарламада.

Айта кетелік Мемлекеттік кірістер комитеті шетелдік көздерден қаржыландырылатын тұлғалардың тізімін жариялауға қатысты түсінік берген еді.