Шиелі ауданы әкімін сайлауда көкпаршылар дауыс берді
Шиелі ауданында өтіп жатқан әкім сайлауында жергілікті көкпаршылар командасы №299 сайлау учаскесінде өз таңдауын жасады, деп хабарлайды Kazinform.
Шиелі ауданында барлығы 50402 сайлаушы тіркелген. Оның ішінде 694 жас алғаш рет дауыс беруге қатысады.
Аудан көлемінде 40 учаскелік комиссияның 388 мүшесі жұмыс атқарады.
Шиелі ауданындағы №299 сайлау учаскесіне көкпаршылар да келіп, өз таңдауын жасады.
Саптама етік киіп, тобылғы қамшы ұстап ұлттық спортты насихаттап жүрген жігіттер саяси науқанда бірлік танытып, дауыс беруге келді.
«Бүгін біз үшін - айтулы күн. Сондықтан ауылдағы көкпаршылар жиналып, бірге дауыс бердік. Сайлауға әркім жауапкершілікпен қарап, ел ертеңі үшін дауыс беруі тиіс», - деді көкпаршы Жомарт Сәрсенбекұлы.
Айта кетсек, Шиелі ауданына кандидат ретінде 3 азамат тіркелген. Олардың барлығы да жоғары білімді, мемлекеттік қызметтің түрлі сатысынан өткен.
