Шығыс Қазақстан фермерлеріне қыста жем-шөп жете ме

ӨСКЕМЕН. KAZINFORM – Шығыс Қазақстан облысындағы мал шаруашылығымен айналысатын кәсіпкерлерде қыста жем-шөп тапшылығы мәселесі биыл болмайды деп болжанып отыр.

Өткен жылы ауа райының қолайсыздығы мен шөп дайындау жұмыстарының сылбырлығы салдарынан өңір фермерлері қиындыққа тап болған еді. Жем-шөп тапшылығы мәселесі әсіресе Тарбағатай, Ұлан, Катонқарағай, Күршім және Марқакөл аудандарында өзекті болды.

Ал Марқакөлде тіпті жарты ай бойы толассыз жауған қардан төтенше жағдай жарияланып, аудан оқшауланып қалған. Бұрын мұнда жыл бойы үйір-үйір жылқы емін-еркін жайылып келсе, өткен қыста малды таудан алқаптарға айдауға тура келді. Соның арқасында еліміздің батысында болғандай малдың жаппай қырылуының алдын алды.

Биыл жағдай айтарлықтай реттеліп қалды.

- Жазда жауын-шашынның мол жаууы шөптің шүйгін өсуіне жағдай жасады. Осылайша, шаруаларға мол шөп дайындап, келесі маусымға қор жасауға мүмкіндік туды. Бұл қаржылық жағынан да тиімді шешім. Себебі шөпті тапшылық кезінде сатып алғаннан гөрі алдын ала дайындаған әлдеқайда арзан, - деп хабарлады ШҚО Ветеринария басқармасынан.

Мамандардың айтуынша, 2024 жылы жиналған шөп қоры бір жарым жылға жетеді.

Еске салсақ, осыған дейін ШҚО-да бруцеллез жұқтырған адам саны артқаны хабарланған.