Шығыс Қазақстан халқының орташа жалақысы қанша

ӨСКЕМЕН. KAZINFORM – Шығыс Қазақстан облысы тұрғындарының ай сайынғы табысы өсіп келеді.

2025 жылдың екінші тоқсанында облыс халқының орташа айлық жалақысы 417 мың теңгеден асты. Бұл өткен жылмен салыстырғанда 11,4%-ға көп. Статистикаға ірі және орта кәсіпорындардың деректері ғана енгізілген. Шағын бизнес есепке алынбады.

Ұлттық статистика бюросының мәліметінше, ең жоғары жалақы әдеттегідей өнеркәсіп пен қаржы салаларында тіркелген. Ал ауыл шаруашылығы мен әлеуметтік қызмет көрсету салаларында табыс ең төменгі деңгейде қалып отыр.

- Номиналды жалақы – бұл инфляцияны есепке алмай көрсетілетін сома. Ал халықтың шынайы табысы баяу өсіп келеді. Бір жыл бұрын өңірдегі орташа жалақы шамамен 375 мың теңге болған, ал қазір ол 417 мың теңгеден асты. Демек, бір жыл ішіндегі өсім - 42 мың теңге, - деп хабарлады ведомство өкілдері.

Облыстағы жалақы өсімі ел бойынша орташа көрсеткішпен сәйкес келеді. Десе де Шығыс Қазақстан жалақы көлемі жағынан мұнай өндіретін аймақтардан артта, бірақ аграрлы өлкелердің ішінде алда тұр.

Еске салсақ, осыған дейін Қырғызстанда орташа айлық жалақы 42 мың сомнан асқаны хабарланған.