Шығыс Қазақстанда 55 шақырым суару каналы тазартылды

ӨСКЕМЕН. KAZINFORM — Вегетациялық кезеңге дайындық аясында Шығыс Қазақстан облысының «Қазсушар» филиалы 55 шақырым суару каналын тазартты. Бұл туралы Су ресурстары және ирригация министрлігі мәлімдеді.

Ведомствоның мәліметінше, Ақжар учаскесінде 8 шақырым, Зайсан учаскесінде 9,3 шақырым, Күршім учаскесінде 37,7 шақырым канал тазартылды. 

Алдағы уақытта тағы 30 шақырым каналды тазарту жоспарланып отыр.

— Шығыс Қазақстан облысында биыл вегетация маусымы 10 күнге ерте басталды. Қазіргі уақытта облыста суару кезеңі белсенді фазасы жүріп жатыр. Бүгінгі күнге шаруалармен суармалы су беру жөнінде 290 келісімшарт жасалды, — деді Шығыс Қазақстан облысының «Қазсушар» филиалының директоры Нұржан Әміржанов.

Бұған дейін хабарланғандай, су ресурстарының ұлттық ақпараттық жүйесінің төрт модулі пилоттық режимде іске қосылды.