Шығыс Қазақстанда алып қыз бала дүниеге келді

ӨСКЕМЕН. KAZINFORM – Шығыс Қазақстан облысы Тарбағатай ауданында салмағы 5 келі алып қыз бала туды.

ШҚО Денсаулық сақтау басқармасы баспасөз қызметінің мәліметіне сүйенсек, Наурыз мейрамы басталғалы Тарбағатай аудандық ауруханасында 9 сәби дүние есігін ашқан.

- Жаңа туған нәрестелер ұлттық киім кигізіліп, шығарылды. Олардың арасында салмағы 5 келіге жететін алып қыз да болды. Ата-анасы оған Бегімай деп ат қойды, - делінген ақпаратта.

Бұдан бөлек, Наурыз мейрамына орай Риддер қаласының мәдениет сарайында салтанатты түрде тұсаукесу рәсімі өтті. Барлығы 22 баланың тұсауы кесіліп, ақсақалдар кеңесінің мүшелері ақ батасын берді. Балаларға мерекелік сыйлықтар да таратылды.

Еске салсақ, бұған дейін Наурыз мейрамы қарсаңында Астана қаласындағы сервис және туризм колледж ұжымы ұмытылып бара жатқан қазақтың дәстүрлі тағамы – жентті дайындауды қолға алып, 15 метрлік жент жасағанын жазған болатынбыз.