Шығыс Қазақстанда қысқа дайындық қалай жүргізіліп жатыр
ӨСКЕМЕН. KAZINFORM – Синоптиктер Шығыс Қазақстан облысында алдағы қыста қар қалың жауады, кейде аяз -45 градусқа дейін жетеді деп болжап отыр. Kazinform тілшісі өңірдегі жол және коммуналдық қызметтердің мұндай ауа райына қаншалықты дайын екендігін біліп көрді.
Ел шығысында қыс мінезі қаһарлы. Өткен жылдың басындағы ауа температурасының күрт өзгеруі мен қалың жауған қар Марқакөл ауданында төтенше жағдайдың жариялануына да себеп болғаны белгілі. Қаңтар-сәуір айлары аралығында облыста ауа райы жағдайына байланысты жолдар 44 рет, орташа есеппен 12 сағатқа жабылып отырған.
Сондықтан қысқа дайындықты тыңғылықты жүргізу аса маңызды. Қазірдің өзінде көктайғаққа қарсы 100 тоннадан астам материал сатып алынып, құрал-жабдықтар жөндеуден өткен.
«Жалпы Шығыс Қазақстанда қыс кезінде төтенше жағдайларды жою жоспарына сәйкес 1717 адам мен 686 техника жұмылдырылуға дайын. Оның ішіне коммуналдық және жол қызметтері де кіреді. Департаментте апаттық-құтқару және эвакуациялау жұмыстарын жүргізу үшін 114 рельефтік техника да сақадай сай», - дейді ШҚО ТЖД төтенше жағдайларды жою басқармасының бастығы Ернар Жәлелов.
Жалпы облыс бойынша 256 шақырым жол жиі қар құрсауында қалады. Оның 112 шақырымы - республикалық маңызы бар жолдар.
Бұл жолдарда «Қазавтожол» ұлттық компаниясының еншілес кәсіпорны - «КАЖсервис» ЖШС Шығыс Қазақстан облыстық филиалы қызмет көрсетеді.
«Біздің филиал республикалық маңызы бар 597 шақырым жолда қызмет көрсетеді. Оларды қыста күтіп-ұстау үшін қазір 100 мамандандырылған қар тазалау техникасы әзір тұр. 2024 жылы арнайы техникалар паркін жаңартып, 6 ауыр автогрейдер алдық. Сонымен қатар жолдарды қардан қорғау үшін 1100 арнайы қар қалқанын дайындадық», - дейді кәсіпорынның бас инженері Айдын Нұралдинов.
Еске салсақ, осыған дейін Шығыс Қазақстандағы қар тазалайтын техникалар қысқа әлі толық дайын еместігін хабарлаған едік.
