Шығыс Қазақстанда күздің алғашқы айында ауа райы құбылмалы болмақ
ӨСКЕМЕН. KAZINFORM — Шығыс Қазақстан облысында қыркүйек айының басында ауа райы ыстық болғанымен, кейін өңірдің жекелеген аудандарында үсік жүруі мүмкін.
Күздің алғашқы айының ішінде жылы ауа райы бірнеше рет қайта оралады. Ал ай соңына қарай облыстың солтүстік-шығысында ауа температурасы -4 градусқа дейін төмендеуі ықтимал. Синоптиктер таулы аймақтарда алғашқы жаңбыр аралас қар жаууы мүмкін деп болжап отыр.
Жалпы қыркүйек айында Шығыс Қазақстанда ауа райы климаттық нормаға сай болады деп болжанған. Айдағы орташа температура +7-ден +14,8 градусқа дейін болады. Дегенмен ауа райы жиі құбылып тұрмақ.
— Қыркүйектің алғашқы күндері жаздың жалғасын сезінуге мүмкіндік береді. Күндіз ауа температурасы +24, кей жерлерде +29 градусқа дейін көтеріледі. Алайда кейін температура күрт төмендейді. Күндіз +11…+16 градус, түнде небәрі +1…+6 градус болады. Облыстың батысы мен солтүстік-шығысында осы кезеңнің өзінде алғашқы үсік жүруі мүмкін. Температура -1 градусқа дейін төмендейді, — деп хабарлады «Қазгидромед» РМК облыстық филиалынан.
Алғашқы суықтан кейін күн қайта жылынады. Бірақ 10 қыркүйекке қарай ауа температурасы тағы да төмендейді.
Айдың ортасында ауа райы апта сайын дерлік құбылып тұрады. Екінші онкүндіктің басындағы салқыннан кейін күндіз қайтадан +20, кей жерлерде +25 градусқа дейін жылынады. Түнде температура +15 градусқа дейін жетуі мүмкін. Одан кейін тағы бір күрт суыту кезеңі болады.
— Екінші онкүндіктің соңына қарай түнде ауа температурасы +1…+6 градус аралығында болады. Облыстың шығысында -1 градусқа дейін үсік жүруі мүмкін. Күндіз ауа температурасы +10…+15 градус шамасында болады, — делінген хабарламада.
20 қыркүйектен кейін күндіз ауа температурасы тағы да +17…+22 градусқа, ал түнде +7…+12 градусқа дейін көтерілуі ықтимал.
Алайда қыркүйек айының соңында күн суытады. Күндіз небәрі +4…+9 градус, түнде +1…+6 градус болады. Облыстың солтүстік-шығысында синоптиктер -4 градусқа дейін үсік болатынын болжап отыр.
Сонымен қатар қыркүйек айы облыста жауын-шашынды болуы мүмкін. Өңір аумағының басым бөлігінде жауын-шашын мөлшері климаттық нормадан жоғары болады деп болжанған.
Айта кетейік, бүгін батыстағы екі қалада ауа сапасы нашарлайды.
