Шығыс Қазақстанда Ресейге апаратын жаңа көпірдің құрылысы басталмақ

ӨСКЕМЕН. KAZINFORM – Шығыс Қазақстан облысындағы Шемонаиха ауданын Өскемен қаласымен байланыстырып отырған жалғыз көпір 2008 жылдан бері апатты жағдайда тұр.

Жаңа көпірдің жобасы дайын

Бұл – өте маңызды көпір. Себебі ол Шемонаиха тұрғындарын облыстың басқа қала, аудандарымен байланыстырады. Тіпті Қазақстан мен Ресейдің арасын жалғайтын стратегиялық маңызды құрылым. Тозғанына қарамастан көпірмен көліктер арлы-берлі қатынап жүр. Бірақ ондағы қозғалыс реверсивті жүйемен шектелгендіктен жүргізушілер үшін қолайсыздық пен кептеліс тудырып келеді. Яғни, апатты жағдайдағы көпірге салмақ түсірмес үшін көліктерге бір уақытта екі бағытта қозғалуға тыйым салынған.

Бүгінде жаңа көпірдің жобасы дайын. Құрылыс жұмыстары биылғы жазда басталмақ.

Шығыс Қазақстан облысы Жолаушы көлігі және автомобиль жолдары басқармасының басшысы Нұржан Жұмаділовтің айтуынша, жобалық-сметалық құжаттама аяқталуға таяу. 10 сәуірге дейін жоба мемлекеттік сараптамаға жіберіледі деп жоспарланып отыр. Ал сараптамаға жіберілсе, 45 жұмыс күні ішінде шешім шығарылуы тиіс. Осылайша, құрылыс осы жылдың екінші жартысында басталуы мүмкін.

- Жаңа көпір екі жолақты болады. Ұзындығы - 242 метр. Жаяу жүргіншілерге арналған жол да қарастырылған. Құрылыс жұмыстары ескі көпірге демонтаж жасамай жүргізіледі. Жаңа көпір ескісі орналасқан жерден жоғарырақ салынады, - дейді басқарма басшысы.

Жобаның құны кіреберіс жолдарды қосқанда 8,5 млрд теңгеге бағаланып отыр. Бұрын қымбаттырақ болады деп жоспарланған еді (14 млрд теңге). Қаражат республикалық бюджеттен бөлінеді. Көлік министрлігі жобаны қолдаған.

60 жылдан астам уақыт бұрын салынған

Жаңа көпір салынса Шемонаиханы Өскеменмен, Қазақстанды Ресеймен байланыстыратын көлік желісінің негізгі буыны қалыптасады.

- Бұл көпір тек жергілікті маңызы бар нысан емес. Ол халықаралық тасымалда ауқымды рөл атқарады. Бұл Шемонаиха ауданын облыс орталығымен ғана емес, Қазақстанды Ресей Федерациясымен байланыстыратын республикалық жолдың учаскесіндегі түйіспе. Жол Өскемен, Алматы қалаларын және оңтүстіктегі көршілес Қырғызстан мен Өзбекстан елдеріне транзитпен жалғасып жатыр. Яғни, бұл – бүкіл ел үшін маңызды стратегиялық нысан, - дейді Шемонаиха ауданы әкімінің орынбасары Бақытжан Молдаханов.

Алайда оның қазіргі жағдайы мүшкіл. 60 жылдан астам уақыт бұрын салынған көпір осыншама көп көлікті өткізуге арналмаған. Бүгінде оның үстімен күніне мыңнан астам көлік, соның ішінде ауыр техникалар жүріп өтеді.

- Бұл кезінде берік көпір болған. Бірақ Қарагужихадан кенді тасымалдаған кезде әбден тозып кеткен. Енді ол мына жүктемені көтере алмайды, - дейді көлік жүргізушісі Александр Иванченко.

Биыл жазда басталады деп жоспарланған отырған құрылыс жұмыстары Жол активтері сапасы ұлттық орталығының бақылауында болмақ. Мамандардың айтуынша, жаңа көпір заманауи стандарттарға сай және жоғары қарқынды көлік ағынына төтеп береді.

- Жоба мемлекеттік сараптамадан өткен бойда біз республикалық бюджеттен қаржы сұратамыз. Тиісті жоспар құрылған. Сосын жазға дейін тендер жарияланады. Одан кейін мердігерлер құрылысты бастап кетеді, - деп хабарлады Жолаушы көлігі және автомобиль жолдары басқармасынан.

Осылайша, алдағы айларда Шығыс Қазақстан, Ресей және республиканың оңтүстік облыстары арасында қауіпсіз әрі жайлы қозғалысты қамтамасыз ететін өңірдегі маңызды көпірдің құрылысы басталады.

Еске салсақ, бұған дейін «Бипек-Авто» ісі бойынша сот үкімі шыққаны хабарланған.