Шығыс Қазақстанда тағы да қар көшкіні түсірілді

ӨСКЕМЕН. KAZINFORM – Шығыс Қазақстан облысында жасанды жолмен қар көшкіні түсірілді.

ШҚО Төтенше жағдайлар департаменті баспасөз қызметінің мәліметіне сүйенсек, тау бөктерінде 4 рет жарылыс жасалды.

- Қар көшкінінің алдын алу шарасы облыстық маңызы бар «Өскемен-Тарғын-Самар» тасжолының 95-102 шақырымында жүргізілді. Барлығы 1145 текше метр қар түсірілді. Жолды жауып қалған қар көп ұзамай тазаланды. Қазір жол ашық тұр, - деп хабарлады ведомство өкілдері.

Наурыз айында тауда қар көшкіні қаупі арта түседі. Себебі күн күрт жылынып, қар ери бастайды. Сондықтан ТЖД қызметкерлері азаматтарды таулы жерлерге бармауға шақырды.

Еске салсақ, бұған дейін Шығыс Қазақстандағы тасжолдардың бірі көліктің барлық түрі үшін жабылғаны хабарланған.