«Шығыстан Батысқа дейін»: Алматыда 100-ден астам қуыршақ қойылған көрме ашылды
АЛМАТЫ. KAZINFORM — Қазақстан Республикасы Мемлекеттік орталық музейінде коллекциялық қуыршақтар көрмесін ашылды.
Көрмеде «Art Dolls Collection_KZ» шығармашылық одағының құрамына кіретін Алматы, Астана, Жаркент қалаларынан жиналған 21 шебер 140 авторлық жұмысын ұсынып отыр. Бұл іс-шара көктем мен жаңарудың мерекесі — Наурыз мейрамы аясында өткізіліп отыр.
«Шығыстан Батысқа дейін» көрмесінің ашылуына Алматының белгілі суретшілері, галеристері, кәсіпкерлері және қала тұрғындары қатысты. Ұйымдастырушылардың айтуынша, көрменің мақсаты — алматылықтар мен қала қонақтарына еліміздегі талантты шеберлерін және олардың бірегей жұмыстарын таныстыру.
— Қазақстанның бірнеше қаласынан келген шеберлердің көрмесі ашылды. Қала тұрғындары мен қонақтары 3 сәуірге дейін оны тамашалай алады. Бүгінгі іс-шара аясында қуыршақ авторлары алғыс хатпен марапатталды. Мен өзім ұйымдастырушылықтан бөлек бүгінгі көрмедегі авторлардың бірімін. Осы көрмеге арнайы әзірлеп, екі қуыршақ әкелдім. Олар: Есік «Алтын адамы» мен Үржар абызы. Бұл қуыршақтар Астанадағы Ұлттық музейдің каталогы бойынша жасалды. Іс-шара Наурыз мерекесіне орайластыра өткізіліп отырғандықтан мұнда қазақы нақыштағы қуыршақтар көп, — деді көрме ұйымдастырушысы Татьяна Фисенко.
Ал көрмеге 10 қуыршақ әкелген Жанна Жанаева қуыршақ жасау процессі қалай жүретінін атап өтті. Айтуынша, бір туындыны әзірлеуге кемінде 1 ай кетеді.
— Мен негізі қазақтың ұлттық киімдерімен қуыршақ жасаймын. Алайда өзге де туындыларым бар, мысалы бүгін «Моңғол қызы» атты қуыршағымды әкеліп отырмын. Оны жасауыма Абай атындағы опера балет театрындағы жаңа «Хан Сұлтан» қойылымы себеп болды. Жалпы қуыршақ жасау процессі осындай идея туындаған сәттен басталады. Одан кейін қуыршақтың темір қаңқасын құрамыз. Бет-жүзі мен қол-аяғын шеберлер балқытылған пластик деп атайтын материалдан жасаймыз. Сосын киім-кешегін тігіп, бәрін біріктіреміз. Қуыршақтың көлеміне байланысты уақыты әртүрлі, бірақ кем дегенде 1 ай кетеді, — деді ол.
Сонымен қатар Жанна Жанаева қуыршақ жасауға қалай келгенін айтып берді. Ол бұл өнерді үйрену үшін шетелдік шеберлерден тәлім алған.
— Менің қуыршақ жасап жүргеніме 7 жылдан асты. Маған бұл салаға келу жеңілдеу болды, өйткені архитектор ретінде білімім бар. Бірде журналдан көріп, қуыршақ жасағым келді. Сөйтіп шетелдік мамандарды Алматыға шақырып, өзіміз шетелге барып үйрендік. Себебі бізде жақсы мамандар жоқтың қасы болды. Жалпы қуыршақ жасау өнері арзан дүние емес. Сондықтан біз көбіне оны сатуға емес, адамдар тамашалап, бағалауы үшін жасаймыз, — деді ол.
Қуыршақ шебері көрмеде қойылған туындылардың бағасы көлеміне қарай 500 мыңнан басталатынын атап өтті. Айтуынша, көрменің алғашқы күні-ақ қуыршақ алуға бірнеше адам ниет білдірген.
Еске салайық, бұған дейін Алматыда Жеңістің 80 жылдығына арналған көрме ашылғанын жазғанбыз.
