Шымбұлаққа биыл Оңтүстік Кореядан 15 мыңға жуық турист келеді
АЛМАТЫ. KAZINFORM – Алматыда орналасқан Шымбұлақ тау курорты мен Оңтүстік Кореяның MONA Yong Pyong курорты стратегиялық серіктестік туралы келісімге келді. Kazakh Tourism қолдауымен жасалған келісім екі ел арасындағы туристердің көбеюіне себепші болмақ.
- Пхёнчхан қаласында қол қойылған келісімшарт аясында тараптар Қазақстан мен Оңтүстік Корея арасында жыл сайын туристер мен нұсқаушылар алмасу туралы келісті. 2024-2025 жылғы маусымда Шымбұлаққа Оңтүстік Кореядан 15 мыңға жуық турист келеді деп күтіледі. Сондай-ақ Оңтүстік Корея спортшылары Шымбұлақтағы тау шаңғысынан Азия Кубогы, фристайлдан Әлем Кубогының кезеңдері және басқа да маңызды спорттық шараларға белсенді қатысады. Осы серіктестік аясында Шымбұлақ курортында оңтүстік кореялық спортшылардың оқу-жаттығу жиындары өтеді, - деп хабарлады Шымбұлақ тау курорты баспасөз қызметі.
Еске салайық, бұған дейін Алматының туристік инфрақұрылымы туралы жазғанбыз.
