Шымбұлақта қар көшкініне себепкер болған шаңғышылар жазаға тартыла ма

АЛМАТЫ. KAZINFORM —10 наурыз күні Шымбұлақта үш шаңғышы қауіпті аймаққа кіріп кетіп, қар көшкінінің жүруіне себеп болды. Кazinform агенттігінің тілшісі оларға қандай шара қолданатынын анықтап көрді.

Шаңғы базасының баспасөз қызметі заңнамалық деңгейде демалыс орны мен келушілер арасындағы қарым-қатынасты реттейтін нормалардың жоқтығын атап өтті.

Бұл таудағы заң бұзушылықтармен күресті қиындатып, демалушылар үшін қосымша тәуекелдер тудырады. Сонымен қатар, тәртіп бұзушылар әдетте оқиға орнынан қашып кетеді, өйткені оларды анықтау және қара тізімге енгізу механизмі жоқ.

— Демалыс аумағында құқық бұзушылықтың ауырлығына қарай әкімшілік және қылмыстық жауапкершілікті белгілеу қажет. Бұл демалушылардың қауіпсіздігін қамтамасыз ету үшін керек. Кешегі болған жағдай шара қолданудың маңыздылығын тағы бір рет көрсетті, — деп жауап берді «Шымбұлақ» тау шаңғысы курортының әкімшілігі Кazinform агенттігінің сауалына.

Бұған дейін әлеуметтік желіде Шымбұлақтағы қар көшкінінің видеосы пайда болды.

Кейін Алматы қалалық төтенше жағдайлар департаменті көшкінен ешкім зардап шекпегенін жеткізді. 

Сондай-ақ Шымбұлақта қар көшкініне себеп болған шаңғышылар анықталды.