Шымкентте 13 кәсіпорын 90 қызметкерге 133 млн теңгеден астам жалақы қарыз

ШЫМКЕНТ. KAZINFORM - Шымкент қаласындағы бірқатар кәсіпорында жалақы бойынша берешек мәселесі әлі де өзекті күйінде қалып отыр.

Қазіргі таңда 13 кәсіпорын 90 қызметкерге 133 млн теңге көлемінде жалақы төлемегені анықталған. Берешек сомасы бойынша көш бастап тұрған – «Шымкентхиммонтаж» жауапкершілігі шектеулі серіктестігі. Бұл кәсіпорын үш жұмысшысына 19 млн теңге көлемінде еңбекақы берешек. Бұдан бөлек, «Total Industry» ЖШС – 4 жұмысшыға 4,7 млн теңге, ал «Хлопкопром-Целлюлоза» ЖШС – 7 жұмысшыға 5,7 млн теңге қарыз. Сонымен қатар, тағы 2 кәсіпорында 4 жұмыскерге 1,76 млн теңге көлемінде мерзімі өткен жалақы берешегі бар. 
Алайда ең күрделі жағдай – банкроттық және оңалту рәсіміндегі 8 кәсіпорында байқалып отыр.

Бұл кәсіпорындар 72 жұмыскерге 102 млн теңге көлемінде жалақы берешегін өтеуге тиіс. Аталған сома жалпы берешектің 77 пайызын құрап отыр. 

- Біз өз тарапымыздан қарап отырған жоқпыз. Іс – қимыл жасап жатырмыз. Берешектер толығымен орындалғанша уәкілетті органдармен өзара іс қимылда боламыз. Жалақы берешегін қордаланбауы біз үшін өзекті және күн тәртібінен түспейтін болады, - деді Мемлекеттік еңбек инспекциясы комитетінің Шымкент қаласы бойынша департаменті басшысы Жеңіс Мақұлбаев.

Тағы бір айта кетер мәселе, жыл басынан бері қала аумағында 13 өндірістік жазатайым оқиға тіркеліп, соның салдарынан 9 адам ауыр жарақат алып, 4 адам көз жұмған. Оқиғалардың негізгі себептері ретінде жұмысты ұйымдастырудағы кемшіліктер, қауіпсіздік шараларының толығымен қамтамасыз етілмеуі және жұмысшылар тарапынан жол берілген өрескел абайсыздықтар мен жол-көлік оқиғалары көрсетілуде.

Айта кетейік, бұдан бұрын Шымкентте әкімдіктің 54 қызметкері құмар ойынға бой алдырғанын жазған болатынбыз.