Шымкентте бір аптада екі бүйрек трансплантациясы жасалды

ШЫМКЕНТ. KAZINFORM - №1 қалалық клиникалық ауруханасының дәрігерлері бір аптада екі бүйрек алмастыру отасын жасады.

49 жастағы әпкесінің бір бүйрегі сіңлісіне салынды. Рецепиент 2 жылдан бері созылмалы бүйрек жетіспеушілігімен кезекте тұрып келген және гемодиализ аппаратына тәуелді болған. 

Сондай-ақ, аурухана дәрігерлері 1987 жылы туған науқасқа қарындасының бүйрегін хирургиялық жолмен салып берді. Туыстық трансплантациялар сәтті өтті.

— Донорлар мен рецепиенттер палатаға ауыстырылды, жағдайлары жақсы. Оталарды аурухана дәрігерлері — Т.Садыков, Байтеміров, Р. Үмбетжанов, Б. Бауыржан, Д. Қабылов, У. Мұқанова, К Айтуов, Б. Керімкулов жасап шықты, — делінген Шымкент қаласы денсаулық сақтау басқармасының баспасөз қызметі таратқан ақпаратта. 

Айта кетейік, бүгінге дейін № 1 қалалық клиникалық ауруханасында 233 бүйрек және 32 бауыр трансплантациясы жасалды.

Еске сала кетейік, бұдан бұрын Түркістан облысында ана өлімі екі есеге өскенін жазған болатынбыз.