Шымкентте дәрігерлер ішегі бірнеше жерден тесілген азаматты аман алып қалды
ШЫМКЕНТ. KAZINFORM — Науқас ауруханаға ауыр хәлде жеткізілген. Тексеру барысында оның ас ішегі 3-4 жерден тесіліп, іш қуысына инфекция тарағаны анықталды.
Осылайша Шымкент қалалық №1 клиникалық аурухананың дәрігерлері 38 жастағы азаматты ажалдан арашалап қалды.
Дәрігерлердің айтуынша, асқазаннан өткен ұзындығы шамамен 3 сантиметр болатын өткір сүйек ішекті тесіп, перфорацияға әкелген. Соның салдарынан перитонит — іш пердесінің жедел қабынуы басталған. Науқаста тамақ өтімсіздігі де байқалған.
— Науқасқа шұғыл түрде хирургиялық ота жасалды. Міндетті әлеуметтік медициналық сақтандыру аясында өткен ота барысында хирургтер ішекті тесіп тұрған сүйекті алып, зақымдалған ішек бөліктерін тігіп, қалпына келтірді. Сондай-ақ іш қуысы толық тазартылып, перитониттің зардаптары жойылды. Ота 1,5 сағатқа созылып, жалпы жансыздандырумен өтті. Қазіргі таңда науқастың жағдайы тұрақты, — деп хабарлады Әлеуметтік медициналық сақтандыру қорының Шымкент қаласы бойынша филиалы.
Ота жасаған хирург-дәрігер Нұрғали Тұрлыбаевтың айтуынша, дер кезінде көрсетілген медициналық көмектің арқасында ауыр асқынулардың алдын алу мүмкін болған.
Ал науқастың өзі дәрігерлерге кәсіби шеберлігі мен медициналық көмегі үшін алғысын білдірді.
Айта кетейік, бұдан бұрын Шымкентте дәрігерлер 4 жасар баланың ішіндегі үлкен ісікті күрделі отаның көмегімен алып тастағанын жазған едік.
