Шымкентте қарсы жолаққа шығып, жолды жапқандар жауапқа тартылды
ШЫМКЕНТ. KAZINFORM – Қарсы жолға шыққандар көлік жүргізу құқығынан айрылды.
Картежде жүрген жастар жол қозғалысы ережесін өрескел бұзған. Атап айтқанда, қарсы жолаққа шығып, тыйым салынған жерде артқа жүрген. Сондай-ақ, кейбірі терезеден шығып тұрған жолаушыларды алып жүріп, өзінің ғана емес, өзгенің де қауіпсіздігін елемеген. Ал темір тұлпарға орнатылған жанып-өшетін маяктар төтенше жағдай тудырып, басқа жүргізушілерді жол беруге мәжбүрлеген.
Тәртіп сақшыларының жедел әрекет етуімен тәртіпсіздік уақытылы тоқтатылды.
- Жедел басқару орталығының бейнебақылау инспекторлары түнгі уақытта қала көшелерінің бірінде автокөліктер кортежін анықтады. Кортеж қатысушылары досының тойынан шығып, осылайша мерекелеуді жалғастырғаны белгілі болды. Құқық бұзушылар әкімшілік жауапкершілікке тартылды, оның ішінде қарсы жолаққа шыққандар көлік жүргізу құқығынан айырылды. Полиция жолдағы немқұрайлылық қайғылы жағдайларға әкелуі мүмкін екенін ескертеді және жол қозғалысы қағидаларын қатаң сақтауға шақырады, - делінген Шымкент қаласы полиция департаментінің баспасөз қызметі таратқан ақпаратта.
Айта кетейік, бұдан бұрын Шымкентте есірткі таратқан екі әйел ұсталғанын жазған болатынбыз.
