Шымкентте полицейді ұрған жасөспірім жазаланды

ШЫМКЕНТ. KAZINFORM — Сот полиция қызметкерін ұрған жасөспірімнің ісін қарады. Оқиға тұрғын үйдің ауласындағы төбелеске байланысты шақырту кезінде орын алған.

Іс кәмелетке толмағандардың істері жөніндегі мамандандырылған ауданаралық сотында қаралды. Оқиға өткен жылдың қараша айында болған. Ауладағы төбелес туралы хабарламаға полиция қызметкерлері жедел жеткен. Жасөспірім алдымен патрульдік көлікті теуіп, тәртіп сақшылары көліктен шыққан кезде олардың заңды бұйрығын елемеген.

Ол қарсыласу кезінде полицейлердің бірін жұдырықпен ұрған. Тәртіп сақшысы жеңіл жарақат алды.

— Сотталушы өз кінәсін мойындап, шын өкінетінін айтып, жеңіл жаза тағайындауды сұрады. Жәбірленушілер жаза тағайындау мәселесін соттың қарауына қалдырды, — деп хабарлады сот.

Прокурор жасөспірімнің бас бостандығын шектеуді талап етті.

Сот айыпталушыны «Билік өкіліне қатысты қорқыту немесе күш көрсету әрекеттері» бабы бойынша кінәлі деп тапты.

— Сот айыпталушының шын жүректен өкінуін жазасын жеңілдететін жағдай ретінде қарастырды. Ешқандай ауырлататын мән-жайлар анықталған жоқ, — деп түсіндірді сот.

Нәтижесінде жасөспірімге 1 жыл, 4 ай бас бостандығын шектеу жазасы тағайындалды. Үкім заңды күшіне енді.

Бұған дейін Қызылордада ойын-сауық орындарында беймезгіл жүрген 242 жасөспірім ұсталғаны туралы жазған болатынбыз.