ШҚО әкімі: Жолдарда қар тазарту жұмыстарын тәулік бойы қатаң бақылауда ұстау керек
Қысқы кезеңде қалалар мен облыстардың көлік жолдарын ұстау бойынша өткен арнайы мәжілісте өңір басшысы республикалық маңызы бар күре жолдарға қызмет көрсететін «Казахавтодор» және «Қазавтожол» қызметтерінің дайындығын сынға алды, деп хабарлайды «ҚазАқпарат» ХАА тілшісі.
Қолда бар деректер бойынша қазіргі уақытта барлық техника жұмыс жасауға дайын емес, қыста жолдарға қажетті құралдар, техникалар мен ЖЖМ көзделген болса да қосымша бірлік тарту бойынша резерв пайдаланылмаған. Даниал Ахметов отырыс кезінде ҚР Инвестициялар және даму вице-министріне «Казахавтодор» және «Қазавтожол» жергілікті филиалдарына тексеру жүргізуге өтінішін білдіріп, телефон соқты.
«Мен Берік Қамалиевпен сөйлестім, ол сіздерді ширату үшін бригада жіберетін болды. Сіздердің қанағаттанарлықсыз жұмыстарыңызға менің көзім жетті» деп ренішін жасырмады Ахметов.
Тиісті қызметтер басшылары Шығыс Қазақстан жолдарын қысқы ұстауға дайындықтары туралы баяндады. Ауа-райының қолайсыздығына орай жолдар жабылған жағдайда жылыну пункттері қарастырылған, қалалар мен аудандарда өндірістік үй-жайлар мен бокстар дайындалған. Мәжіліс барысында облыс әкімінің орынбасары Дүйсенғали Мусин төрағалық ететін жедел штаб құрылды. Құрылған штабқа Өскеменді қардан тазарту үшін қосымша техниканы ұйымдастыру тапсырылды. Өңір басшысы тәулік бойы мониторинг жүргізуді, қосымша техника тартуды және өткен қыстың қателерін ескеруді тапсырды. «проблемалық учаскелерді ерекше бақылауға алу қажет. Осиновск, Байбура, Ұмыш асулары, Қалбатау және Өскемен арасындағы учаскелер. Бұл жерде сағат сайын мониторинг жүргізу және осы жерлерге қосымша техника жіберуге дайын болуларыңыз қажет», - деп ескертті Д.Ахметов.