ШҚО-да 8 наурыз мерекесіне орай 16 мыңға жуық әйел бір реттік төлем алады

ӨСКЕМЕН. KAZINFORM – Шығыс Қазақстан облысында 8 наурыз – Халықаралық әйелдер күніне орай бірнеше санаттағы әйелдерге 15 мың теңге көлемінде төлем беріледі.

Бұл туралы облыс әкімдігінен мәлім етті.

- Халықты әлеуметтік қорғау жүйесінде ана мен баланы қолдау тетіктері көзделген. Осы ретте, 8 наурыз - Халықаралық әйелдер күні қарсаңында облыста «Алтын алқа», «Күміс алқа» алқаларымен наградталған немесе бұрын «Батыр Ана» атағын алған, I және II дәрежелі «Ана даңқы» ордендерімен наградталған әйелдерге, 4 және одан да көп кәмелетке толмаған баласы бар аналарға 15 000 теңге мөлшерінде біржолғы төлем беріледі, - делінген ақпаратта.

Бүгінде Шығыс Қазақстанда 12 400-ден астам көпбалалы әйел тұрады. Оның ішінде: 4 және одан да көп кәмелетке толмаған баласы бар 8829 әйел бар. Сондай-ақ «Алтын алқа», «Күміс алқа» алқаларымен марапатталған 3588 көпбалалы ана тіркелген.

Еске салсақ, бұған дейін Астанада 8 наурыз мерекесіне орай 36 мың әйел адамға біржолғы әлеуметтік төлем берілетіндігі хабарланған.