ШҚО-дағы аурухана әкімшілігінің 27 кәсіпкер алдындағы қарызы 134 млн теңгеге жеткен

ӨСКЕМЕН. KAZINFORM – Шығыс Қазақстан облысы Күршім ауданындағы аурухана әкімшілігі 27 кәсіпкерге 134 млн теңге төлемеген.

Шығыс Қазақстан облысы Күршім ауданының прокуратурасы мемлекеттік сатып алу саласында заңнаманың сақталуын талдау барысында коммуналдық мемлекеттік кәсіпорын тарапынан заңбұзушылықтарды анықтады.

«Атап айтқанда, аудандық аурухана әкімшілігі жасалған келісім-шарттар бойынша өз міндеттемелерін орындаған 27 кәсіпкердің алдындағы 134 млн теңге қарызын өтемеген. Прокурорлық қадағалау актісіне сәйкес, аурухана басшылығы қазіргі уақытта 20 кәсіпкерге 98,3 млн теңге көлемінде қарызды төледі», - деп хабарлады облыс прокуратурасының баспасөз қызметінен.

Аурухана әкімшілігі қалған қарызды қысқа мерзімде өтейтін болады.

Еске салсақ, осыған дейін ШҚО-дағы кәсіпорынның 220 жұмысшысы жалақыларын ала алмай келгені хабарланған.