ШҚО-да Ертістің арнасынан асқан су тасжолды басып қалды

АСТАНА. ҚазАқпарат - Шығыс Қазақстанда тасжолды тасқын су басып қалды, деп хабарлайды өңірлік ТЖД баспасөз қызметі.

«9 сәуір күні Бесқарағай ауданында Ертіс өзеніндегі су деңгейі көтеріліп, облыстық маңызы бар «Семей-Долонь» тасжолы су астында қалып қойды. Салдарынан 35 шақырым жолды су басты. Арнасынан асқан судың тереңдігі 10-15 см, ені 20 м», - делінген хабарламада.

Бірлік ауылы су тасқынына жақын маңда, небары бір шақырым қашықтықта орналасқан. Су басып қалу қаупі жоқ. Қазіргі таңда өзеннің суы арнасынан асуын тоқтатты.

ТЖ орнына 7 техника мен 16 адам жұмылдырылды.

«ОблШығысЖол» ақпараты бойынша, аталмыш бағыттағы жол барлық көлік түрлері үшін жабылды. Айналма бағыт  «Семей-Бесқарағай-Долонь» тасжолы арқылы жүзеге асырылады.