ШҚО-да қазақша күрестен «Еуразия барысына» іріктеу турнирі басталды

АСТАНА. ҚазАқпарат - Шығыс Қазақстан облысы Қарауыл ауылында қазақша күрестен республикалық кубок басталды. Жарыс еліміздің еңбек сіңірген жаттықтырушысы Манарбек Таутановтың құрметіне өткізіліп жатыр.

Дүбірлі додаға Қазақстанның түкпір-түкпірінен ондаған палуандар жиналды. Олардың ішінде әлем, Еуропа және республика чемпиондары бар. Жарыс үш күнге созылмақ. Топ жарып шыққан жеңімпаз жаңа көліктің кілтін иеленеді. Ал үздік шыққан бірнеше спортшы күзде Тараз қаласында өтетін «Еуразия барысы» турниріне жолдама алады, деп хабарлайды sports.kz.

«Бұл сайыста әр облыстың мықты-мықты деген палуандары өзара бақ сынасады. Өңіріміздің намысын 2013 жылғы «Қазақстан Барысы» Айбек Нұғманов пен басқа да Азия чемпиондары қорғамақ», - деді ҚР еңбек сіңірген жаттықтырушысы Серік Қоржыкенов.