ШҚО-да ресейліктерге арналған «Әдеби белдеу» туристік жобасы жүзеге асады
Бұл қызметке жуықта тағайындалған Алексей Бородавкинді Даниал Ахметов өңірдің әлеуметтік-экономикалық дамуымен қысқаша таныстырып өтті.
«Ресеймен бауырластық қарым-қатынасты сақтау өте маңызды. ШҚО мен РФ арасында дәстүрлі "Алтай - біздің ортақ үйіміз" мәдени-гуманитарлық бағдарламасы аясында жылдар бойы қалыптасқан тығыз қарым-қатынасымыз тек нығая түсуде. Жобаны ары қарай да қолдау қажет. Мәдени серіктестікті нығайту үшін туристерге арналған «Әдеби белдеу» жобасын ұйымдастыруды жоспарлап отырмыз», - деді Даниал Ахметов.
Өз кезегінде Ресей елшісі сауда-экономикалық және мәдени-гуманитарлық, туристік салалардағы екіжақты қарым-қатынасты ары қарай дамытуға мүдделі екенін жеткізді.
«Бұл менің аймаққа алғашқы сапарым. Біз екі елдің дипломатиялық қарым-қатынасына аса мән береміз. Өйткені, бұл аймақ Қазақстан өнеркәсібінің флагманы болып табылады. Сондай-ақ, Шығыс Қазақстанның шет елдермен кең ауқымдағы бизнес байланыстары және әлемнің жетекші мемлекеттерімен металлургия, ауыл шаруашылығы, медицина және басқа да маңызды бағыттары бойынша сауатты экономикалық кооперациясы бар», - деді Алексей Николаевич.
Айта кетейік, өткен жылы ШҚО мен Ресей арасындағы тауар айналымының көлемі 1 млрд. 258 млн долларды құрады. Биыл бұл көрсеткішті 1 млрд. 4 млн. долларға дейін көбейтіп, экспорт пен импорт номенклатурасын арттыру жоспарлануда.