Тыйым салынған аумақта 733 келі балық ұстаған 5 күдікті қолға түсті

АСТАНА. KAZINFORM – Шығыс Қазақстан облысында тыйым салынған аймақта заңсыз балық аулаған бес адам ұсталды. Бұл туралы Polisia.kz сайты хабарлайды.

ШҚО Полиция департаментінің Ұйымдасқан қылмысқа қарсы күрес басқармасы қызметкерлері Бұқтырма су қоймасы жағалауында балық ресурстарын аса ірі көлемде заңсыз аулау дерегін анықтаған.

Оқиға орнында бес күдікті ұсталып, полицейлер олардың қайықтары мен автокөліктерін, сондай-ақ балық тасымалдауға арналған тіркемелерін тәркіледі.

Заң бұзушылар жалпы салмағы 733 келі болатын сазан, шортан, көксерке, қаракөз және табан сынды әртүрлі балық түрлерін ұстаған. Табиғатқа келтірілген залалдың көлемі шамамен 5 миллион теңгеге бағаланып отыр.

Қазіргі уақытта аталған дерек бойынша сотқа дейінгі тергеу амалдары жүргізілуде. Тергеу нәтижесінде процестік шешім қабылданатын болады.

Айта кетейік, үш облыста браконьерлерге қатысты 33 қылмыстық іс қозғалды.